ଧୂମ୍ରପାନ ସ୍ୱାସ୍ଥ୍ୟ ପାଇଁ କ୍ଷତିକାରକ

ଧୂମ୍ରପାନ ଅଟେ ଦୁର୍ବ୍ୟସନ,

ମୁଁହରେ ଲାଗଇ ନିଆଁ ।

ସ୍ୱାସ୍ଥ୍ୟ,ସଭ୍ୟତା,ଧନ ନାଶ ହୁଏ,

ତ୍ୟାଗ କରିଦିଅ ତାହା ।।

ବିଡି ସିଗାରେଟ ପିଇଲେ,

ଦୂଷିତ ହୁଅଇ ବାୟୁ ।

ଛାତି ହୋଇଯାଏ ଚାଲୁଣି ପରି,

ନାଶ ହୁଅଇ ଆୟୁ ।।

ରାତିଦିନ ରହେ ମନରେ,

ତମାଖୁର ହିଁ ସ୍ମୃତି ।

ଖାଦ୍ୟ -ପେୟରୁ ଅଧିକ କରେ,

ଧନ-ସମ୍ପତ୍ତି ଇତି ।।

କେବେ ଫୋଟୋକା ହୋଇଯାଏ,

ପୀଡା ହୁଅଇ ଅଙ୍ଗେ ।

କଣା ହୋଇଯାଏ ପୋଷାକ,

ନିଆଁ ପାଉଁଶର ସଙ୍ଗେ ।।

ଜଳୁଥିବା ବିଡି ଫିଙ୍ଗିବାରୁ,

ଲାଗିଲା କେଉଁଠି ନିଆଁ ।

ଲକ୍ଷ ଲକ୍ଷ ଟଙ୍କାର ସମ୍ପତି ଜଳେ,

ଦାଣ୍ଡରେ ହୁଅନ୍ତି ଠିଆ ।।

ଏପାଖେ ହେଲା ବିନାଶ,

ସେପଟେ କମିଲା ଉତ୍ପନ ।

ନଷ୍ଟ ହେଲା ଅନେକ କ୍ଷେତ,

ନ ମିଳିଲା ସେଠୁ ଅନ୍ନ ।।

ତମାଖୁ ବିଲରେ ଯଦି,

ଅମଳ ହେବ ଅନ୍ନ ।

ହଜାର ହଜାର ପେଟ ଭରିବ,

ମନ ରହିବ ପ୍ରସନ୍ନ ।।

ରଚନାତ୍ମକ କାର୍ଯ୍ୟ ଯଦି,

କରନ୍ତି ବିଡିର ମଜୁରିଆ ।

ତେବେ କୁଡ଼ିଆ ଚାଳ ସ୍ଥାନରେ,

ମହଲ ହୁଅନ୍ତା ଠିଆ ।।

ବଞ୍ଚି ଥାଉ ଥାଉ କାହିଁକି ଦିଅ,

ନିଜ ମୁଁହରେ ନିଆଁ ।

ଆପଣା-ପରର ହିତ ପାଇଁ,

ଛାଡିଦିଅ ଧୂଆଁପିଆ ।।

●●●●●●●●●●●●●●●●●●●●●●●●●●●●●●●●●

ଓଡ଼ିଆ କବିତା